neui bekanntschafte

ich bi scho über e wuche do und s studium het noch wie vor nonit so richtig agfange aber mi sozialläbe entwicklet sich immer wie mehr (juhui).

zu minere grosse freud ha ich festgstellt, dass me do au shithead spiilt. d regle sin zwar bi jedere person liicht anderscht aber hauptsach me spiilt shithead und ich ha au scho anderi neui karte spiil glernt d.h. ich bi glii sehr versiert im karte spiile. die letschte zwei hani geschtert zobe vo zwei vo mine mitbewohnerinne glernt. apropos, ich stell vor:

zimmer nr 1: ellie (sie heisst tatsächlich au eleanor), macht e PhD in organischi chemie und isch e zimlichi klischee-ängländerin: sie stoht offe drzue dass sie trinkt zum betrunke sii, het null scham, stoht uff vrkleide und lost alles möglichi musik egal ob guet oder schlächt. sie isch aber au e durchus liebi und luschtigi person.
zimmer nr 2: dr schuh (kei ahnig wie me das wirklich schriibt), kunnt us taiwan und isch im dritte johr vo sim PhD in "genetics" (är macht stammzelleforschig, was ich sehrsehr cool find). e üsserscht hilfsbereiti person und sis gekoche duftet immer durch die ganz wohnig so das alli hunger bekömme. är goht in e paar wuche zum erscht mol siit 1.5 johr widr hei und das well sini eltere gfunde hän är söll si gäld lieber für reise in europa ussgä. druffabe ischr im friehlig für e wuche oder so ind schwiiz, nach interlake go d bärge aaluege, hihi.
zimmer nr 3: moi!
zimmer nr 4: gähnende leere :(
zimmer nr 5: paulina uss pole. sie macht e PhD in pharmazie (glaub) und isch super. sehr energievoll und sehr lieb.
zimmer nr 6: sara uss italie. sie macht e masters in wirtschaft und vrmisst ihri fründe und ihre färnseh. sie het glaub am meischte scho ztue bis jetzt, was mr bitz e schlächts gwüsse macht. uff jede fall au e sehr liebi person.

mini andere kartespiilkumpane sin d herre uss dr wohnig im unterschte stock. am sunntig obe hets e spontanparty für s ganze huus gä, was super gsi isch, well suscht hani niemerts kennt im huus und jetzt kenni doch einigi. sehr viil asiate hets ka, was füre e überraschig, aber es het zb au dr robbie (au bekannt als jennifer) ka, wo zwar au e klischeeängländer isch (d.h. wenn betrunke zimlich rüd) aber au e durchus intelligänti, luschtigi und liebenswärti person. denn sii treue mitläufer, dr deepak (au bekannt als 2pac) uss indie. dank ihne vrstand ich jetzt au wie me hearts spiilt, was mir vorhär immer e rätsel gsi isch und jetzt findis eigentlich no e cools spiil. ich ha au kenneglernt: e mexikanerin, e amerikanerin, zwei franzose, e cypriot, etc. E durchus internationali sach! Und das in efangs die uss mim huus! Vom studium kenni mittlerwiile au scho paar mensche dank de ganz wahnsinnig spannende iifiehrigssache letscht wuche... D vorläsige vo mim kurs (au bekannt als WaOP) sin oft mit lüt vo ähnliche kürs, do sich alles bitz überschniidet und mi kurs nit so gross isch. In mim kurs hets widrum sehr viil inderinne (die uni isch allgemein massiv international, als wissi ängländerin isch me glaub in dr minderheit do, sehr unterhaltsam) und anderi nationalitäte (chinesisch, uss malaysia, griechisch, kanadisch, etc). die mit dene ich mi aber bis jetzt hauptsächlich abgä sin ängländer. wie das halt so oft isch, finde sich d nationalitäte quasi zämme: d inder mit de inder, d chinese mit de chinese, etc. Mit dr ziit wirds aber sicher durchmischter. U.a. dank de tutoregruppe. Mini tutorin isch forschigsassischtäntin am insti und macht e PhD und kunnt uss italie. Sisch jetzt ihres dritte johr, wo sie das macht und sie isch mini asprächsperson für jeglichi froge, problem, etc bis im Juni. Bim Forschigsprojäkt hani denn e andere betreuer.

ah jä, hani scho gseit, dass es e mega gmietlichs pub het öppe 3 minute vo mim huus entfärnt? sehr praktisch! oder au vrheerend... das gsehni denn no. parties gits au massewiis egal welle wuchetag isch und jetzt isch denn no d nottinghamer version vo dr herbschtmäss für e paar täg. es git also gnueg ztue aber ich nimm aa glii wirdi miesse afo läse und so für mini vorläsige. jetzt sötti eigentlich usefinde wo ich ka mini folie ussdrucke aber s wätter isch grad so gruusig dusse, dassi nit use will :-s am zwei muessi denn, denn gohts in die nöggschti vorläsig und hüt zobe ins schwimmtraining.

also, ich raff mi mol uff, bis bald mini liebe!