lena, dä blog isch für di

mi erschte iitrag, was für ein abenteuer. eigentlich hätti jo scho bevori uff honduras bi sötte dä blog afo, denn hätte nit alli miesste mini kilometer langi mails läse, aber wie bi so viilem im läbe hanis halt nit gmacht und denn doch bereut und wie bi viilem siit neuem hani mi jetzt doch drzue überwunde. s läbe isch halt scho e grosses abenteuer.

siit geschtert zobe hani melancholischi stimmig und los sehr oft stevie wonder i believe (when i fall in love it will be forever). drbii magi so lieder eigentlich nit so und bi au nit vrliebt. oder villicht doch. in mi abenteuer. amigs hani so richtig schmätterling im buuch, was ka schön sii aber au drzue ka fiehre dass mr schlächt wird. ich wird sehr viil lüt sehr fescht vrmisse au wenni weiss dass sie immer für mi wärde do sii egal wo ich uff däre wält bi aber am liebschte würdi sie halt scho mitnäh aber leider isch mi koffergwicht uff 30kg beschränkt, was scho so schwiirig sii wird zum iihalte. apropos, welli schueh sölli bloss alli mitnäh?!

lena, dä blog isch bitz e liebeserklärig an di. du weisch, ich wird immer für di do sii und es git wenig ziit, wenn ich nit an di dänk. das trifft natürlich nit nur uff d lena zue, aber ich glaub, ich muess jetzt nit alli uffzelle. wär e namentlichi erwähnig möcht, sölls sage.

uff jede fall bini no fünf täg do und so gsehn mini plän uss für die täg: bi grad sinnlos bim arzt gsi und jetzt gangi denn ins fitness, drnoch machi no mit dr steffi, dr aurelia und zobe mit dr cynthia ab (hauptsach shithead und bier!). (jetzt hän dir au no euri namentlichi erwähnig beko) morn hani efangs dr plan ins fitness zgoh, am friitig au widr fitness, e letschti massage bi dr anne und zobe hoffentlich e gueti party. samschtig gits denn no e kleine abschiidsalass bi mir dehei - details kommen später. sunntig zobe muessi mi denn vo dir vrabschiide, lena. ah jä und packe sötti au no. vrdammt, do kunnt widr d schueh frog uff. näbe däm allem wird ich mi no bitz nervös mache wägem studium, mi no über männer uffrege obwohli mi nit über männer sött uffrege dene ich nit 100% vrtrau well das isch irgendwie widrsprüchlich und mi hoffentlich entscheide welli schueh ich mitnimm. ah und hani party und bier scho erwähnt?

bisous